DESIR PANTAI

DESIR PANTAI

Oleh : Shaff Ra Alisyahbana Dt Malako

Indak disangko rigo-rigo

Pipik sinanduong makan padi,

Indak disangko nan ka baiko

Pisou dikanduong makan diri

Ajuong dilauik limo-limo

Dibaliek pulou ranggei mati,

Karam dilauik kawan timbo

Nan bedo karam dalam hati

Tali kayie panjang sapuluoh

Di rantang lalu ka tapian,

Dalam ayie badan bapaluoh

Bak itulah raso panangguongan

Satu lelan satu kulari

Samo gadang kapalonyo,

Satu bulan satu mantari

Samo bendang cahayonyo

Tabang gagak tabang limpatu

Samo tabang kaduonyo,

Duduok anak duduok minantu

Anak sorang jadi baduo

Marpati tabang mambubuong

Inggok batenggek dibuah palo,

Bapak Mandeh alah baruntuong

Anak sorang jadi baduo

Karakok tumbuoh di madang

Di lipek caro Melayu,

Urang banci di sangko sayang

Badan cilako indak tahu

Sitarak lasuong batingkah

Di pakan urang bajua bali,

Dulu di agah inyo marandah

Kinin di agah makin tenggi

Awuo di sasak buluoh apo

Jalan karimbo suluong-suluong

Nampak bana tolan pangapo

Dalam taluok di lingkuong gunuong

Marawei di angkek-angkek

Bajalan di pamatang sawah,

Sadang di dewa indak dapek

Konon di alang patah kapak

Batang pauoh batang cubadak

Subaliek batang si kasumbo,

Awak jauoh badan taragak

Musim pabilo ka basuo

Rumah si Lembak tapi jalan

Rotan barauik di pagunyo,

Manembak indak ba sasaran

Ikan di lauik di tujunyo

Bintang Timuo baminyak manih

Tagelang-gelang di tapian,

Jago tiduo duduok manangih

Mangana untuong jo bagian

Tandikek kayu tandikek

Dakek kayu nan bagatah

Tabang dilangik kami pikek

Inggok di rantieng kami gatah

Ari nan hujan-hujan paneh

Jamuoh takaka di halaman,

Hati nan arok-arok cameh

Si kunieng lapeh dari tangan

Asok api gabun bagabun

Asok urang batanak garam,

Tolah balayie di ateh abun

Jikok di lauik takuik karam

Dalimo buah dalimo

Masak sabijo dibaliek daun,

Kasieh adiek ditarimo

Indak lupo baribu tahun

Anak singiang-ngiang rimbo

Basarang di buku tabu,

Sungguoh tangiang di talingo

Kito baduo baru tahu

Pisang sasikek duo sikek

Sasikek di ateh abun,

Anak bujang jolong ba ikek

Sungguoh bak bungo kambang arun

Ilie motor urang Siabu

Singgah bamalam di Sitinjak,

Wak putieh muko barabu

Bak rupo ayam makan dadak

Lapiek sulerang duo lerang

Jatuoh salerang dalam padi,

Adiek didalam tangan urang

Basuo juo dalam mimpi

Cincin suaso manyuaso

Cincin manduo sabuah tangan,

Adiek lah lamo tabinaso

Mangapo lapuok di kalangan

Rumah gadang bakasuo kawek

Di titi sambie balari,

Indak kami diganggam arek

Umpamo cincin mangatam jari

Pisang sirage-rage buah

Babuah subaliek pandakian,

Sadang di lae sudah barubah

Konon di dalam panantian

Kudo urang kudo mandaki

Kudo awak malao padang,

Mudo urang mudo balaki

Mudo awak marando panjang

Katokin namo biawak

Basarang rumpum rumbio,

Kok untuong dapek di awak

Kok indak di urang juo

Duio tigo cinago tali

Cino bajudi di ateh palang,

Duo tigo bulieh diganti

Indak sarupo jo nan ilang

Tabaliek-baliek mato tajak

Mambaliek rumpuik di halalam,

Tabaliek-baliek mato mamak

Mancaliek anak jo kamanakan

Tuan haji tagak di kapa

Tagak manggoyang-goyang camat,

Kok jadi indak ka kaka

Jikok kaka indak salamat

Sarei sarumpun di halaman

Tenggi ramuwe tampek mandi,

Tingga kampuong tingga halaman

Tingga tapian tampek mandi

Cancang rabuong di kuliti

Baok manyasa ka tapian,

Dagang lalu di tangisi

Jangan manyasal kamudian

Tetek anuo di cukokan

Tabuong barisi piang masak,

Saketek sajo ambo ibokan

Biduok karam tiang tak tampak

Tabang pipik anam-anam

Inggok di rantieng bangkaulu,

Tabik paja bintang tabanam

Adiek kanduong tingga daolu

Kukuok ayam darei badarei

Hari paneh langgam bakabuik,

Pabilo bungo nan ka rarei

Disitu tolan kami japuik

Sariek dimano ambo tugakan

Antaro batu jo tanaman,

Adiek dimano mabo tinggakan

Antaro pintu jo halaman

Anakdaro bapayuong sitin

Sudah sitin si kalek pulo,

Awak hino lage musikin

Sudah mikin mularat pulo

Anak balam tajingkek-jingkek

Ado duri di kakinyo,

Tangah malam duduok basikek

Ado budi di hatinyo

Ampek-ampek parang di Lintou

Parang jo anak Rajo Rao ,

Ubek lakek pantang talampou

Babaliek suruik panyakik lamo

Kapak gadang ka panabang

Kapak panabang kayu mati ,

Nandak sanang di bari sanang

Nandak sanang mamutui hati

Sapu tangan panyapu tangan

Baok ma ambiek mamupuo bungo

Malang tangan cilako badan

Tiok di adang ado nan punyo

Pisang timbatu di ateh batu

Pisang nan duo di kalangan,

Awak ketek anak piatu

Gilo dimabuok angan-angan

Sirieh kunieng bajunjuong anak

Unak bajunjuong umbuik rotan,

Putieh kunieng paraman lunak

Nan hitam manih ma hanyuikkan

Sipak sepei ayie di dulang

Indak batimbo-timbo lai,

Sampei-sampei dagang dibuang

Indak ta duo tigo lai

Masak buahnyo jambu ayie

Amakan anak karo jantan,

Pabilo pelang nan ka balayie

Di ambek Timuo jo Salatan

Biduok tumangguong kayu jati

Sudah takarang bilah-bilah ,

Duduok bamanuong kanei hati

Manaruoh dandam alun sudah

Sirauik ba ulu cangkeh

Ba ulu tanduok kaduonyo ,

Sorang tapauik sorang lapeh

Baranti mabuok kaduonyo

Biriek-biriek sayoknyo lamah

Basitunggam makan ka bumi,

Adiek sapantun karakok tanah

Indak jamak makanan diri

Cubo-cubo manggulei pantou

Antah batulang antah tidak ,

Cubo-cubo pai marantou

Antah kapulang antah tidak

Alah sudah ambo tabang jungkang

Indak guno di radah lai ,

Alah sudah ambo buang hilang

Indak guno di kana lai

Cubadak duo namonyo

Limpato dibuang jangan,

Kok taragak sabuik namonyo

Ayie mato dibuang jangan

Belok-belok mangayie panto

Jangan takayie anak balanak,

Elok-elok mamilie jando

Jangan tapilieh anak banyak

Kabou gadang baranak lumpuoh

Baranak dalam pasangan,

Tompangkan kami dalam sungguoh

Pa ambiek bungo ka pamenan

Cucuok sangguoh ameh sabatang

Di tayie mangko di bali ,

Ilak-ilak Marapuley datang

Di mano ayie basuoh kaki

Sidi dama takuok padam

Takuok tatumpah pado kaki,

Kami ko umpamo balam

Jangan di ubah padan janji

Kuo-kuo si panti anak

Mati di tembak jo sumpiktan,

Urang baduo badosanak

Sorang nan randah pancaliekkan

Ampang limo mudiek bajujuik

Dipasuntieng bungo durian,

Sampang paguno tolan japuik

Kok indak haram di acuohkan

Randah-randah bungo jilatang

Tenggi bungo pandak kaki ,

Mailak-ilak Marapuley datang

Dimano ayie basuoh kaki

Makan naneh di puncak gunuong

Sakin dimano di layokkan ,

Hujan paneh bulieh balinduong

Mikin kamano di ondokkan

Hari paneh batanam lado

Tanam sagagang di halaman ,

Biduok ameh layie kasumbo

Mangapo lapuok di kalangan

Antah mumbang antah kalapo

Di kuncang badakuok-dakuok ,

Antah tuah antah cilako

Sakik pinggang dibaok duduok

Gulinggang di tapi tabek

Di tabek anak manggulito ,

Kok indak urang nan maimbek

Batamu juo badan kito

Hari paneh batuduong pinggan

Pinggan barisi daun kayu ,

Kasieh tolan tadorong inggan

Kasieh kami tadorong lalu

Aka nibuong barasok-asok

Aka mati dalam parahu ,

Takaba kampuong bulie bakirok

Takaba hati siapo tahu

Urang Padang lalubarampek

Cabiek-cabiek tapi kainnyo,

Nan ilang indakkan dapek

Carinan lain panggantinyo

Bio-bio di salobatang

Ruso mamakan umbuik padi,

Sio-sio mato mamandang

Dosolakek main takjadi

Kapakan ka Lansek Kodok

Kukuo karambie jo bungonyo,

Tolan sapantun bungo dadok

Layuo apokan gunonyo

Laweh sawah di Simauong

Babelok  jalan ka  Ciroceh,

Sungguoh  pandei  adiek  balinduong

Mangapo kasieh indak jaleh

Manurun ruso  dari  Sitinjak

Turun  kalambah  makan  padi,

Baieklah  kito  badosanak

Bia  doso  kito  jauohi

Taratak  gunuong  Pasaman

Kurinci  mandi  babaju,

Kok  taragak  tolan  bapasan

Dalam  mimpi  kito  batamu

Ujuong  Marak  labuohan  Bugih

Timuo barambui  sampei  siang,

Dalam  galak ado manangih

Badan  baduo  tingga  sorang

Kapakan  mambali  galobok

Kukuo  karambie  jo  bungonyo,

Tolan  sapantun  bungo  dadok

Kok  layuo  apo  kagunonyo

Kalauik  kaluang   mandi

Sikabou  dangka  muaronyo

Bapauik  putui  kan  tali

Batimpo  gunuong  kapalonyo

Saputangan  suto  balipek

Dibaok  naiek  ka  parahu,

Luko  tangan  dapek di ubek

Luko  hati  siapo  tahu

Pandan  sarumpun  dalam  palak

Disauik  mangko di kabek,

Badan  dilamun  dakek  dosanak

Sakik  nan  indak  dapek  ubek

Dalam  sumuo  anak  buayo

Mati di hantak  guntieng  taji,

Bintang  timuo  apokan  dayo

Bulan  lah  dapek  dek  mantari

Elok-elok  manjaik

Elok manjaik di jalujuri,

Elok-elok  dagang  takuik

Elok  takuik di akui

Layang-layang  manyembah  buie

Buyie di sembah  angso duo,

Kasieh  sayang  dicari  bulie

Tampek  hati  larang  basuo

Cincin  banamo  ganto   sori

Sasuei  sajo di kalingkieng

Ilang  kamano ambo cari

Lauiktan  sajo  sakulilieng

Anou  dilolong  mati   pucuok

Pucuok di lingka  ula   gerang,

Biduok  b tadorong kami masuok

Kualo di uni  kapa  parang

Togun-togun di atehrotan

Tajongkek  ikuo  kapalonyo,

Tatagun  pelang di lauiktan

Ilang  kamano  nangkodonyo

Anakbuayodalamlukah

Anta basisiekbaradeibalun,

Adiekkanduongjanganmanyumpah

Jasonanindakbabalehbalun

Si Tiuok  banamo  kawan  rajo

Mambaok  tombak  samo  camin,

Bukan ambo masuok  sangajo

Di baok  ombak  samo  angin.

Kudo  si  Lembak  manyubarang

Tantang  tapian  tampek  mandi

Doso  baduo  bulieh  sorang

Nan bedo  karam  dalam  hati

Anou  di lolong  mati  pucuok

Di tembak  patui  paneh  ari,

Biduok  tadorong kami masuok

Ilang  kamano kami cari

Padi  sipuluik  hitam  tangkei

Padi  siarang di parahu,

Manih  muluik  tolan  pakei

Hati  nan  bimbang kami tahu

Patang  Kamih  malam  Juma’at

Pasang  lilin di ujuonglidi,

Tapiek  banta  tabang   sumangat

Basuo  juo  dalam  mimpi

Bantangkan  lapiek  sapanuoh  rumah

Kami malapeh  pipik  pikou,

Mantak   tabik  sapanuoh  rumah

Kami malapeh  hati  risou

Mamukek  urang  tantang  gosong

Kaneilah  anak  maco  aji,

Kok  indak  urang  nan  manolong

Aram tajajak  tanah  tapi

Kok tau di lamak  umbuik

Cubolah  gulei  padeh-padeh,

Kok tau di sakik  hiduik

Cubolah  sonsong  ayie  dareh

Asok  api di lambah  gunuong

Anak  buayo manggulampei,

Makasuik  hati mamaluok  gunuong

Apo kandayo  tangan tak  sampei

Ala   padam   palito  kapeh

Tolong  jo  miak kami baa,

Alah  pajam  kalauik  lapeh

Tolong  jo  niat kami baa

Angku  Damang  Datuok  narambe

Api-api duo sabenggo,

Cubolah  timbang di  nan pandei

Hati  jo  jantuong  basangketo

Tarang  bulan   malantei  atok

Layang-layang di kedakannyo

Tangah  malam  duduok  maratok

Sadang  sayang  ditinggakannyo

Kayu  kalek  madang di lurah

Di katam di tarah  jangan,

Janji  arek  padamlah  sudah

Tuhan   balun  manyampeikannyo

Gaba-gaba di lamantansi

Mainan  anak  urang  tutupan,

Saba-saba  tolan  mananti

Dagang  dalam   pasakiktan

Ikan  silayuok  mambulintang

Gilo takepak-kepakjuo,

Takana  jaso  ka  nan  ilang

Raso katampak-tampakjuo

Lambuyuik di tapikoto

Di bae  tabuei-buei,

Lah datang  urang ma anta kato

Nanti  daolu  sudah  tuei

Ambiek api  pasanglah  rokok

Rokok  manjadi  rotan  udang,

Jarieh  sajo  mamanggang  sasok

Sasok  manjadi  ladang  urang

Indak  barabah  makan   padi

Barabah  makan sari bulan,

Indak   barubah   dari kami

Antah   barubah   dari  tolan

Katapak  katapieng  condong

Kiambang  jari   bajari,

Hari   patang   mantari  condong

Kamano  badan  mintak  diri

NATA SINUNUKAN BATAHAN

DESIR NASIB
NATA SINUNUKAN BATAHAN
Gubahan : Shaff Ra Alisyahbana Dt Malako

Balayie biduok dari Tamang
Masuok muaro Pasa Batahan ,
Tompangkan kami di pincalang
Samaso balun bamuatan

Tabukak jandela urang Tamang
Sanang mamandang ka Kikiran ,
Kasieh adiek alang kapalang
Untuok nan tidak babarikan

Pulou Pandan jauoh ditangah
Dilingkuong ujuong Batumandi ,
Elok mati bakalang tanah
Padokan hiduik makan hati

Ilie Nata mudiek Batahan
Hanyuiklah bamban jo ureknyo,
Paruik lapa bulie ditahan
Hati dandam apo ubeknyo

Ayie Bangih dilingkuong Sasak
Sasak dilingkuong Ayie Balam,
Manangih mancari jajak
Jajak ditimpo hujan malam

Urang Tompek batukang loyang
Sudah sakali jo ranteinyo,
Sudah arek di ganggam urang
Cari saraik pa ungkeinyo

Ayie Bangih gunuong marusuok
Karimbo mamikek balam,
Hati bangih bulie dibujuok
Hati ibo ramuok didalam

Ayie Bangih batansi duo
Sabuah mangadok Pulou Panjang,
Manangih buruong rombak Cino
Mananti sayok balun panjang
Ayie Bangih lapou sabalah
Asam jao ditangah laman,
Manangih marabou banta
Raso ka lapeh dari tangan

Sinangih lauok rang Gasan
Banyak rantang Bangkahulu,
Manangih mandanga pasan
Dek bansat saba daolu

Sinangih lauok rang Tiku
Di atuoh jo daun pandan,
Manangih duduok di pintu
Malapeh dagang ka bajalan

Balayie biduok rang Ayiebangih
Balabuoh tantang Pulou Tamang,
Alah patang kironyo ari
Kamano dagang ka manompang

Balayie biduok dari Tamang
Masuok kualo Ayie Bangih,
Santano bulie ka manompang
Dek larat dagang kamari

Ilalang tumbuoh di gunuong
Tumbuoh digunuong Ayie bangih,
Kok ilang kabuki di gunuong
Mangko tampak tanah tapi

Balayie biduok dari Tamang
Sarek mamuek kulik manih,
Layie diangkek angin kancang
Duduok bamanuong anyo lai

Balayie tambangan basikunik
Balabuoh tantang Pulao Tamang,
Kok tibo Tanya jawabnyo rumik
Lapekan untuong sorang-sorang

Gadang rumah di kampuong Tompek
Tiok suduik barisi talang,
Malang tangan badan mularek
Itu manyansei anak dagang

Pulou Tamang lampu babelieng
Tampak nan dari tanah tapi,
Kalou kawan sadang bakepieng
Indak sajalan samo kami

Anyuik parian dari Tamang
Panuoh barisi galo-galo,
Apo ka tenggang anak dagang
Hari patang langkah dielo

Ilang Tamang tampak Bai
Mangirok ujuong Pasie Ngaran,
Takaba tolan dalam rai
Tolan dalam pasakiktan

Kok pai ka Batusondat
Tolong singgah ka Kampuong Kapeh,
Kok lai di Bantu sobat
Jolong batuah lansuong kareh

Bintungan Bajangka mulei rami
Banyak datang rang Banja Auo,
Paruntuongan langkah mulei abih
Bapak pulang mande pun jaoh

MASO KINI 1

DESIR MASO KINI
Oleh : Shaff Ra Alisyahbana Dt Malako

Sikaduduok lai diladang
Tumbuoh rampak si cerek gadang
Induok-induok pai batandang
Duduok barapak kecekkan urang

Bandaro ratib jo jama’ah
Masbuk banyak lambek datang
Antaro Mugarib mananti Isya
Duduok barapak kecekkan urang


Alang lauik manyembah ikan
Inggok malakok dibatang rindang
Ilang runuik mato pancarian
Sasok dikakok urang datang

Lain pulo kulambu kami
Indak basulam tiok suduik
Lain pulo balampu kini
Acok padam pado hiduik

Kain batiek baju marikin
Ragian batanun bungo hati
Lain nasib guru nan kinin
Gajian sataun duo kali

Kain paco bacampuo tali
Pelok paragat di jaik ti
Lain pulo pangusaho kini
Tiok ulayat di kuasoi

Baladang caro pangairan
Marambah dilakik ba usaho
Lah ilang mato pancarian
Tanah di ambiek panguaso

Cubadak ayie masak diparam
Atok di ambiek juaro limo
Sajak pasie balepo haram
Acok baralie muaro lamo

Gagak sakawan di tapi ayie
Bondo indak babondong lai,
Sajak tindawan ado di pasie
Burando indak paralu lai

Tagak losmen di tapi ayie
Sipatokah ba baju gai ,
Sajak ponten bisa di bayie
Dawat sirah ndak ado lai

Biduok-biduok hanyuik manyunggieng
Sampan lalu ba sakekkan ,
Induok-induok duduok barundieng
Sia nan lalu di pakecekkan

Sikaduduok tumbuoh di sasok
Nan abih si rotan sago ,
Nan duduok ba sasak angok
Nan balari tanang sajo

Bajak di tapi lauik gadang
Kan balayie indak barendang,
Sajak lilaki barambuik panjang
Padusi indak pulo basalendang

Badak babali di Tangah Padang
Hati-hati manjinjieng ladieng ,
Sajak padusi basarewa panjang
Laki-laki ba antieng-antieng

Banyak di pantei ba lauokkan
Dimakan itiek saparinduan ,
Sajak nan pandei bapaluokkan
Nan cadiek sato baidu-iduan

Di ulu nipah samo ubin
Disinin ubin ba upahkan ,
Daolu nikah mangko kawin
Kinin lah kawin banikahkan

Tajak dibali ulu katuko
Samak ladang ka di siang ,
Sajak bajudi manjago puaso
Banyak urang bakelah siang

Kaulu kaluang di garo
Putiek kuini banyak manjadi,
Daolu sinduang nan mandayo
Kini manonton tipi jo bajudi

Balanak dijalo lakeh mati
Mak dipindang ka dimakan,
Taranak ilang lakeh dicari
Anak hilang di padiakan

Kue bolu latak dipinggan
Dimakan samo ayie tawa ,
Daolu nan gadih bapingiktan
Kini lia mangalalawa

Banyak remot jadi padoman
Batimbang-timbang siaran lai ,
Sajak kibot jadi hiburan
Badendang-dendang jarang lai

Tajak dibali batangkei buluoh
Marambah samak sawah mudiek ,
Sajak lilaki mamakei dukuoh
Padusi banyak sarewa cabiek

Ombak dilauik nan malacuik
Karam sampan di muaro ,
Kok indak ado nan mambukik
Haram ka tau jantan batino

Masak limuo ditangah ladang
Lado indak dimakan kancie,
Sajak rimou mangacuo karang
Maco indak di tapi pasie
Bajak kayu dielo jawi
Kacou luluok tanah kamek,
Sajak baku ayie lamari
Raso lauok hamba longek

Kapak basi tatieng di ateh
Parian indak ba buku lai ,
Sajak manari cacieng di paneh
Tarian adat ndak laku lai

Daolu kayu ka pananak
Kini miak ka mamasak ,
Daolu anak nan ba umak
Kini umak nan baranak

Tajak rancak pareambah rumpuik
Rambahan dari pandakian ,
Sajak banyak gambar nan iduik
Gambaran mati balupokan

Kaulu timbunan na dikali
Barombongan dari pasa ,
Daolu tuntunan nan dikaji
Kini tontonan nan dikaja

Pacak lokan diateh meja
Saban jalang ditambah pati,
Sajak koran masuok ka desa
Qura’an jarang dibaco lai

Salak Nata tabang sabatang
Dijua anak nan ka ba andam,
Sajak Nata tarang bundarang
Nan muda basuo di nan kalam

Daolu surek indak baketiek
Kini surek di komputerkan ,
Daolu koslet di dalam biliek
Kini koslet bapacaliekkan

Baakan gabak indak ba awan
Banyak biduok lari ma lewa ,
Baakan anak indak malawan
Banyak sumpah dari pangaja

Makan nasi dipinggan jerong
Bakan nasi pangek bauong ,
Baakan kini indak manyerong
Sadangkan laki babuek sayuong

Badak jo camin di lamari
Nandak badandan ntuok manari ,
Sajak kaset pandei mangaji
Banyak Qura’an lapuok dilaci

Miak makan parandang nasi
Latak pinggan dimeja panjang,
Sajak adzan urang ditipi
Banyak urang indak sumbayang

Kaulu jalan agak bapirou
Dihaluan kanei langkisou,
Daolu adzan banyak disurou
Kini adzan banyak di lapou

---- ( SRY – 180399 )

SAKAPUO SIRIEH

SAKAPUOH SIRIEH SAGATOK PINANG
Oleh : Shaff Ra Alisyahbana Dt.Malako

Jika kita seorang pirsawan/pemirsa televisi,dimana setiap acara Nusantara Menyanyi, Nusantara Menari dan Cakrawala Budaya Nusantara maupun Gatra Kecana, kita akan melihat ke- Bhinneka Tunggal Ika-an Seni Budaya Wawasan Nusantara Indonesia yang berkewajiban kita untuk menghidup suburkan serta menumbuh kembangkan Nilai Budaya Bangsa.

Bila kita perhatikan corak,ragam,langgam dan langkah serta lenggang lenggok irama Seni Budaya Nusantara, RANAH NATA tidak kurang dari itu dan tidak kalahnya dengan Citra dan Kirananya Kesenian Daerah Pesisir Nata yang ada dalam Senandung Lagu Daerah Pesisir Nata ( SELADA PESTA ) maupun Tarian Daerah Pesisir Barat ( TADAH SIRAT ).

Untuk itu kami tampilkan beberapa Dendang Pesisir Pantun Berantai ( DESIR PANTAI ) kehadapan kita semua, semoga ada manfaatnya.
Seandainya banyak terdapat kesalahan, mari kita perbaiki bersama guna untuk menciptakan kesederhanaan.
Sebelum memasuki DESIR PANTAI yang nantinya dibarengi dalam Bahasa Nasional, kami tampilkan beberapa pantun sebagai pembukaan :

Blog banamo Desir Pantai
Dipelok dek Shaff Ra Alisyahbana
Tahu dimano basuo nan lalai
Tolong sampeikan supayo bana

Blog bernama DESIR PANTAI
Dibuat oleh Shaff Ra Alisyahbana,
Tahu dimana yang telah lalai
Tolong sampaikan supaya sempurna

Dulu Mancukie Tareh Tarandam
Kini banamo Taman Ranah ,
Tahu manyisie mano nan alam
Kini budayo samakin punah

Dulu mencongkel teras terendam
Kini bernama Taman Ranah ,
Tahu memilah mana yang alam
Sekarang budaya semakin punah

Sumpah Pemuda limo salapan
Batamu Pak Datuok dari Medan ,
Ulah budayo kamajuan jaman
Lagu Pasisie lapuok di taman

Sumpah Pemuda lima delapan
Bertemu Pak Datuk dari Medan,
Ulah budaya kemajuan zaman
Lagu pesisir lapuk di taman
Kok rancak Sinanduong taman
Jagolah lagu Pasisie nan barantai,
Kok taragak Kampuong halaman
Bacolah blog “ DESIR PANTAI “

Kalau indah senandung taman
Jagalah lagu Pesisir yang berantai,
Kalau rindu kampung halaman
Bacalah blogspot DESIR PANAI.

Demikianlah sanak saudara dan selanjutnya kami ajak kita semua ber – Dendang Pesisir dengan Pantun Berantai ( DESIR PANTAI ) pada bagian berikutnya…..